(ខេត្តត្បូងឃ្មុំ)៖ នៅព្រឹកថ្ងៃចន្ទ ទី២២ ខែមិថុនា ឆ្នាំ២០២៦ វេលាម៉ោង ៧:០០ នាទីព្រឹក ក្រុមការងាររាជរដ្ឋាភិបាលចុះមូលដ្ឋានក្រុងសួង បានរៀបចំកម្មវិធី «វេទិកាសាធារណៈ» ដើម្បីជួបប្រាស្រ័យទាក់ទង ពិគ្រោះយោបល់ និងដោះស្រាយបញ្ហាប្រឈមនានាជូនប្រជាពលរដ្ឋ ដែលពិធីនេះត្រូវបានប្រព្រឹត្តទៅនៅក្នុងបរិវេណវត្តពណ្ណរាយ ភូមិពណ្ណរាយ សង្កាត់សួង ក្រុងសួង ខេត្តត្បូងឃ្មុំ។
វេទិកាសាធារណៈដ៏មានសារៈសំខាន់នេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្ដមសាស្ត្រាចារ្យ ធា គ្រុយ ប្រធានក្រុមការងាររាជរដ្ឋាភិបាលចុះមូលដ្ឋានក្រុងសួង។ ក្នុងនោះដែរ ក៏មានការអញ្ជើញចូលរួមជាអធិបតីភាពពី ឯកឧត្តម ង៉ូវ បូរីណា អនុប្រធានទី១ ក្រុមការងាររាជរដ្ឋាភិបាលចុះមូលដ្ឋានក្រុងសួង, ឯកឧត្ដម សួង សុភណ្ឌ អនុប្រធានទី២ ក្រុមការងាររាជរដ្ឋាភិបាលចុះមូលដ្ឋានក្រុងសួង ព្រមទាំងមានការអញ្ជើញចូលរួមពីសំណាក់ អាជ្ញាធរដែនដី មន្ទីរ-អង្គភាពពាក់ព័ន្ធ និងបងប្អូនប្រជាពលរដ្ឋនៅក្នុងមូលដ្ឋានយ៉ាងច្រើនកុះករ សរុបប្រមាណជាង ៣០០នាក់។
គោលបំណងចម្បងនៃការរៀបចំវេទិកាសាធារណៈនាឱកាសនេះ គឺដើម្បី៖
ជួបប្រាស្រ័យទាក់ទងផ្ទាល់៖ បង្កើតនូវភាពជិតស្និទ្ធរវាងថ្នាក់ដឹកនាំ និងប្រជាពលរដ្ឋនៅមូលដ្ឋាន។
ស្វែងយល់ពីសុខទុក្ខ៖ ក្តាប់ឱ្យបានច្បាស់លាស់នូវស្ថានភាពរស់នៅជាក់ស្តែង និងជីវភាពរបស់បងប្អូនប្រជាពលរដ្ឋ។
ដោះស្រាយបញ្ហាប្រឈម៖ ប្រមូលរាល់សំណើ សំណូមពរ និងដោះស្រាយរាល់បញ្ហាខ្វល់ខ្វាយនានាដែលកើតមានឡើងនៅក្នុងមូលដ្ឋាន ជូនបងប្អូនប្រជាពលរដ្ឋដោយផ្ទាល់ ឱ្យបានទាន់ពេលវេលា និងប្រកបដោយប្រសិទ្ធភាពខ្ពស់។
នៅក្នុងអង្គវេទិកានោះ បងប្អូនប្រជាពលរដ្ឋបានលើកឡើងនូវសំណើ និងសំណូមពរមួយចំនួនពាក់ព័ន្ធនឹងការអភិវឌ្ឍមូលដ្ឋាន ជីវភាពរស់នៅ ក៏ដូចជាសេវាសាធារណៈ។ បន្ទាប់ពីបានស្តាប់នូវការលើកឡើងរបស់ប្រជាពលរដ្ឋរួចមក ឯកឧត្តមប្រធាន និងថ្នាក់ដឹកនាំក្រុមការងារ រួមជាមួយអាជ្ញាធរដែនដី និងមន្ទីរជំនាញពាក់ព័ន្ធ បានធ្វើការបកស្រាយបំភ្លឺ ព្រមទាំងបានដោះស្រាយជូនបងប្អូនប្រជាពលរដ្ឋភ្លាមៗនៅនឹងកន្លែងចំពោះបញ្ហាចាំបាច់ ចំណែកឯសំណើណាដែលត្រូវដោះស្រាយតាមជំហាន ក្រុមការងារបានកត់ត្រាទុកដើម្បីយកទៅពិភាក្សា និងស្វែងរកដំណោះស្រាយជូននាពេលក្រោយ។
ថ្លែងនៅក្នុងឱកាសនោះដែរ ថ្នាក់ដឹកនាំក្រុមការងាររាជរដ្ឋាភិបាលចុះមូលដ្ឋានក្រុងសួង បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋទាំងអស់ ដែលបានចំណាយពេលវេរាមកចូលរួមយ៉ាងកុះករ និងបានលើកឡើងនូវមតិយោបល់ ក៏ដូចជាបញ្ហាប្រឈមនានាដោយត្រង់ទៅត្រង់មក ដែលនេះជាយន្តការដ៏សំខាន់ និងឆ្លុះបញ្ចាំងពីតម្រូវការជាក់ស្តែង ដើម្បីរួមគ្នាកសាង និងអភិវឌ្ឍមូលដ្ឋានក្រុងសួងឱ្យកាន់តែរីកចម្រើនបន្ថែមទៀត ស្របតាមគោលនយោបាយដ៏ត្រឹមត្រូវរបស់រាជរដ្ឋាភិបាល៕